ಬೆಂಗಳೂರು: ಮಹಿಳಾ ಪ್ರಯಾಣಿಕರ ಸುರಕ್ಷತೆ ಕುರಿತ ಆತಂಕ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಬೆಂಗಳೂರಿನಲ್ಲಿ ಮಹಿಳೆಯರಿಗಾಗಿಯೇ ಮಹಿಳಾ ಚಾಲಕರನ್ನು ಒಳಗೊಂಡ ‘ಸಖಿ’ ಎಂಬ ವಿಶೇಷ ರೈಡಿಂಗ್ ಪ್ಲಾಟ್ಫಾರ್ಮ್ ಫೆಬ್ರವರಿ 14ರಿಂದ ಅಧಿಕೃತವಾಗಿ ಆರಂಭವಾಗುತ್ತಿದೆ. ಆಟೋ, ಟ್ಯಾಕ್ಸಿ ಹಾಗೂ ಇತರೆ ರೈಡ್-ಹೇಲಿಂಗ್ ಸೇವೆಗಳಲ್ಲಿ ಮಹಿಳೆಯರಿಗೆ ಎದುರಾಗುವ ಅಹಿತಕರ ಅನುಭವಗಳಿಗೆ ಪರಿಹಾರ ನೀಡುವ ಉದ್ದೇಶದಿಂದ ಈ ಹೊಸ ಪ್ರಯತ್ನ ರೂಪುಗೊಂಡಿದೆ.
‘ಸಖಿ’ ಪ್ಲಾಟ್ಫಾರ್ಮ್ ಸಂಪೂರ್ಣವಾಗಿ ಮಹಿಳಾ ಪ್ರಯಾಣಿಕರು ಮತ್ತು ಮಹಿಳಾ ಆಟೋ ಚಾಲಕರಿಗಾಗಿಯೇ ವಿನ್ಯಾಸಗೊಳಿಸಲಾಗಿದೆ. ಓಲಾ ಮತ್ತು ಉಬರ್ ಮಾದರಿಯ ರೈಡ್-ಹೇಲಿಂಗ್ ವ್ಯವಸ್ಥೆಯಂತೆ ಇದು ಕಾರ್ಯನಿರ್ವಹಿಸಲಿದ್ದು, ಸುರಕ್ಷತೆ ಮತ್ತು ವಿಶ್ವಾಸಕ್ಕೆ ಹೆಚ್ಚಿನ ಒತ್ತು ನೀಡಲಾಗಿದೆ. ಜನವರಿಯಲ್ಲಿ ನಡೆದ ಪ್ರಾಯೋಗಿಕ ಚಾಲನೆಯಲ್ಲಿ ಈ ಸೇವೆ ಕೇವಲ ಒಂದು ವಾರದಲ್ಲಿ ಸುಮಾರು 17 ಟ್ರಿಪ್ಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ.
ಈ ಯೋಜನೆಯ ಹಿಂದೆ ಇರುವ ಆಲೋಚನೆಯ ಬಗ್ಗೆ ಸಂಸ್ಥಾಪಕಿ ಕೃಷ್ಣವಿ ಪರೇಖ್ ಮಾತನಾಡಿ, ಮುಂಬೈನಲ್ಲಿ ಓದುತ್ತಿದ್ದಾಗ ಹಾಗೂ ನಂತರ ಕೆಲಸ ಮಾಡುತ್ತಿದ್ದ ಸಮಯದಲ್ಲಿ ತಮಗೆ ಎದುರಾದ ಅಸುರಕ್ಷಿತ ಪ್ರಯಾಣ ಅನುಭವಗಳೇ ‘ಸಖಿ’ ಯ ಕಲ್ಪನೆಗೆ ಕಾರಣವಾಯಿತು ಎಂದು ತಿಳಿಸಿದ್ದಾರೆ. ತಡರಾತ್ರಿ ಕ್ಯಾಬ್ ಪ್ರಯಾಣ, ಪಿಕ್-ಅಪ್ ಸ್ಥಳ ಬದಲಾವಣೆ ಕೇಳುವ ಚಾಲಕರು ಮತ್ತು ದ್ವಿಚಕ್ರ ವಾಹನದಲ್ಲಿ ಅಸೌಕರ್ಯ ಅನುಭವಗಳು ಮಹಿಳೆಯರಿಗೆ ಸಾಮಾನ್ಯ ಸಮಸ್ಯೆಗಳಾಗಿವೆ ಎಂದು ಅವರು ವಿವರಿಸಿದ್ದಾರೆ.
ಸಖಿ ಸೇವೆ ಆರಂಭಿಕವಾಗಿ ಬೆಳಿಗ್ಗೆ 6ರಿಂದ ಮಧ್ಯರಾತ್ರಿ 12ರವರೆಗೆ ಲಭ್ಯವಿರಲಿದೆ. ಬೇಡಿಕೆ ಹೆಚ್ಚಾದಲ್ಲಿ 24 ಗಂಟೆಗಳ ಸೇವೆಗೆ ವಿಸ್ತರಣೆ ಮಾಡಲಾಗುತ್ತದೆ. ದರದ ವಿಚಾರದಲ್ಲಿ, ಮೊದಲ ಎರಡು ಕಿಲೋಮೀಟರ್ಗೆ ಕನಿಷ್ಠ 50 ರೂ. ಮತ್ತು ನಂತರ ಪ್ರತಿ ಹೆಚ್ಚುವರಿ ಕಿಲೋಮೀಟರ್ಗೆ 20 ರೂ. ನಿಗದಿಪಡಿಸಲಾಗಿದೆ. surge pricing ಇರುವುದಿಲ್ಲ ಎಂಬುದು ವಿಶೇಷ.
ಸಖಿ ಆಟೋ ಸೇವೆಯನ್ನು ride.sakhiwomen.in ವೆಬ್ಸೈಟ್ ಮೂಲಕ ಅಥವಾ 63619 33364 ಸಂಖ್ಯೆಗೆ ವಾಟ್ಸ್ಯಾಪ್ ಮೂಲಕ ಬುಕ್ ಮಾಡಬಹುದು. ಮಹಿಳೆಯರ ಸುರಕ್ಷಿತ ಸಂಚಾರಕ್ಕೆ ‘ಸಖಿ’ ಹೊಸ ಭರವಸೆಯಾಗಿ ಕಾಣಿಸುತ್ತಿದೆ.
